منوعات

الأصل في المعاينة هو (تبادل) المعلومات, هو شنو؟ تباااددل معلومات.

حول المعاينات

مدني:مدني نيوز

الأصل في المعاينة هو (تبادل) المعلومات, هو شنو؟ تباااددل معلومات.

زي ما الشركة بتعمل ليك interview انت كمان بتعمل interview للشركة.

بس أكيد ماحتقول ليهم اتكلموا لي عن نفسكم ولا شايفين نفسكم وين بعد 5 سنوات! 😀

قبل ماتكمل البوست خلينا نتفق انو الـ HR في البوست دا حنسميهو سرجيو بوسكيتس, اتفقنا؟ اتفقنا.

هدف بوسكيتس يعرف عنك, هدفك انت تخت نفسك في أفضل صورة ممكنة للوظيفة.

مبدئياً الشوط الأول من المعاينة في ملعب بوسكيتس.
لقدام حوريك كيف تتصدى أسئلتو والغرض منها.

أما الشوط التاني بيبدأ بسؤال بوسكيتس”عندك أي إستفسارات؟”
وفي رواية: “عندك سؤال حابي تسألو لينا؟”

هنا الكورة بتجيك لحد عندك.
أنسى سؤال الراتب كم والحوافز والاجازات, لو ده الغرض الرئيسي من التقديم اسأل الموظفين قبل ماتمشي المعاينة عشان تختصر على نفسك الزمن والتعب في حالة ماعجبك.

عشان نكون واقعيين, فعلياً الراتب مكانو الصح كغرض اساسي -جزء لا يتجزأ- مش رئيسي.
يعني لو الراتب اقل من طموحك بس المسمى الوظيفي أو الشركة حتعمل وزن في الc.v كدة الموضوع يستاهل تفكر فيهو.

متذكر لمن بوسكيتس طلب منك تتكلم عن نفسك؟ هو عارفك وقدامو تفاصيلك بس الغرض شنو؟ (داير يعرف شخصيتك واهتماماتك).

متذكر لمن سألك من الراتب المتوقع؟
كان عايز يعرف:-
1- إذا انت مقيّم نفسك فعلا حسب خبراتك ومؤهلاتك؟
2- هل توقاعتك مناسبة مع الرينج المخصص للوظيفة دي ولا لأ.

باااسس, انت حتسأل بنفس المبدأ, سؤال في ظاهره شئ وفي باطنه شئ آخر, استغل المساحة دي في إنك تظّهر نقاط قوتك وشخصيتك وتوريه عمق تفكيرك واهتمامك بالوظيفة ومجالها.

قبل تبدأ, اخد نفس عميق, اشكرو على المساحة دي وبعد كدة قول بسم الله.

الاسئلة حتتمحور حول:
– الشركة أو المنصب.
اسئلة تدل على انك شغوف بالوظيفة.
اسئلة مفتوحة, مش الإجابتها “لا” أو “نعم”.

مثلا أهم الاسئلة:-
– في حالة التعيين أهم هدف مفروض أحققو شنو في أول 3 شهور؟
الإجابة حتديك لمحة عن أول أهدافك وبتأكد حماسك, مع إني في شخصي الضعيف ضد الحماس في الشغل بس بوسكيتس عندو رأي تاني, بس ماتتحمس أكتر من اللازم. 😀

– شنو أكتر حاجة لفتت انتباهك في الc.v وشايفو مناسب للوظيفة؟
الإجابة حتوريك نقاط قوتك وبتوحي انك مهتم.

– شنو هو العائق الممكن يقيف ليكم في تعييني؟
حتعرف نقاط ضعفك وماتخجل انك تطلّع ورقة وقلم وتكتبها, في النهاية بتفيدك انت وبتعالجها لقدام وبتعزز من سُمعتك.

بالإضافة لو في عائق ممكن تعالجو حتعرفو هو شنو وحتقدم مقترح للمعالجة إن وجد, مثلاً لو قال مكان سكنك بعيد, هنا ممكن تقول ماعندي مشكلة في اني أرحل لمكان قريب من شغلي.

والسؤال المفضل عندي
– لو تم بإذن الله قبولي في الوظيفة, ومرت كم سنة لقدام, وقتها كيف حتقيس اني كنت الخيار الأنسب للوظيفة دي؟
بسؤالك ده حتاخد لمحة لهدف طويل الأجل + بتبين إنك شخص ذو حنكة وذكاء مش سطحي + بوسكيتس حيتخيل شكلك وانت بتطور وبتحقق في الأهداف الحيقولها ليك.

بعد كدة سؤالك الختامي.
– متين اتوقع منكم رد؟
عشان انت ماناقص علاقات توكسيك.

الاسئلة كتيرة الممكن تستفيد منها, انت اقعد مع نفسك وفكر لقدام براها حتجي في بالك.
عن ثقافة الشركة.
عن طريقة الادارة.
المهم نوّع في المحاور عشان توحي بإنك انسان فضولي.

ملاحظة:
اتجنب تسأل أسئلة شخصية.
ألبس كويس.
ما تسأل سؤال ساهل ممكن تلقى إجابته بسهولة في بروفايل الشركة أو الموقع أو أياً كان.
اتهندم.
أحلق.
ما تتباهى بمكانتك الإجتماعية.
ألبس كويس بس ماكويس شديد ما حفلة هي.
حاول أتكلم معاهو بنفس شدة الصوت.
حافظ على ضهرك مستقيم.

وأخيراً..
المعاينة زي الشطرنج, الفرق انو في المعاينة كل طرف بحرك القطع كلها at once.

 

Emad Ginawi

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى