مدني:مدني نيوز
الطنبور في كردفان خلاف الطنبور الشايقي المشهور داك ؛ فطنبور كردفان اغانية جماعية قصيرة زي الدلوكة بس الفرق بينة و بين الدلوكة انو الدلوكة بغنن البنات و الطنبور بغنوا الاولاد؛
فزمان وقت الزمن الجميل مافي حفلة بدعوا ليها؛ و الحفلات ذاتها نااادرة و متباعدة زي الوفيات؛ سبحان الله من شدة الحاجات دي ما كانت بسيطة الناس ماسكنها تاريخ فبقولوا ليك : سنة فلان مات؛
و محل طهرنا ناس فلان؛ و كان مافي حاجة الناس بتخاف منها زي الموت و الحكومة؛ فكان عسكري واحد ممكن يسوق حلة كاملة قدامه؛ و العجب لو زول مات !!! تشوف الناس ديل مهمومين و حزنانين حزن جد ما زي الحزن الهسه دا السيدو بجوعكر و بقول ليك يا ود زيد لينا اللحمة دي شوية؛ ياخي ناس زمان بي عدم تعليمهم كانوا صادقين؛ الواحد تلقاه الحمدو ما حافظها و صلاته كلها غلط لكن لا بياكل حق زول ولا بعتدي على زول ؛ هسه تلقى الواحد حافظ الكتاب من البقرة للناس و ما بعمل شي من الفي الكتاب و دا احسن من البفسر بطريقتو و بخدع الناس؛ زي الفكي الفارش ليه حجابات سعرهن غالي و بقول لزبائنه : ( لا تشتروا بايات الله ثمناً قليلا) و فكي تاني نازل في حلة بكتب للناس و البهايم و بعلم ناس الحلة الصلاة و العبادات؛ الفكي دا اي حاجة فيه سمحة بس بريد العوين حاااار و بياكل براه؛ ففي واحد من مخاسرية الحلة ساله : يا مولانا انحنا سمعنا انو الدين بنهي عن الاختلاط بين الذكر و الأنثى و بدعوا للمشاركة في الاكل بدليل : بارك الله في طعام كثرت فيه الايادي؛ انت لشنو بتدعك في النسوان و بتاكل براك؟
فرد الشيخ قائلا : (حببت لي من دنياكم ثلاث : الصلاة و النساء و الطيب؛) و اما كثرة الايادي دي فقاصدين بيها الايادي المبروكات بتاعة (ابو بكر) و (عمر) و امثالهم ما اياديكم انتم الملوثة دي؛
اها كان في الزمن داك في حفلة في حلة من الحلال؛ ياخي ناس الحلة و الحلال البعيدة و القريبة جاهزين للحفلة دي من زمن بعيد؛ و في يوم الحفلة و بين الوفود ظهر زول طوييييل وجييه مهندم عرف نفسه بانه طنباري؛ ييييييييييييييك الناس خلت باقي الناس و كل الانظار اتوجهت للطنباري زي وجيهة الاعلام للمغاربة؛ والله انا خايف للمنتخب المغربي دي جنس خوف لاننا انحنا السودانين ديل كُج ما وجهنا على شي الا و غطسنا حجرو؛ : شجعنا (قطر) بحكم انهم ديل عيالنا طارت بدون اي نصر؛
وقفنا مع (الارجنتين) ضد (السعودية) تعاطفاً مع (ميسي) السعودية غلبت الارجنتين؛
رحعنا للسعودية بالحمية العربية طيرناها؛
وقفنا مع (اسبانيا) باعتبارها (برشلونة) طلعنا سفتها؛
هسه الله يستر المغرب؛
فالناس اهتموا ليك بالطنباري دا جنس اهتمام : هاك يا لحمة؛
و هاك رِز؛
و الزلابية ما تديك الدرب؛
الشاي؛
القهوة؛
العسلية؛
البقنية؛
و ام شوشو؛
و الطنباري يشيل و يلهط لمن وقف جيرو صدقة بس؛
و بعد شوية الحفلة دورت و الناس قدموا الطنباري فبدا يغني :
يا الهادي يلا معا
يا الهادي جرو معا
يا الهادي يلا معا
يا الهادي جرو معا
الطنباري بغني يا الهادي يلا معا يا الهادي جرو معا و الشيالين وراه؛ لمن اخد ليه نص ساعة الجماعة قالوا ليه غير اغنيتك دي؛ فغيرها :
يا الكابلي يلا معا
يا الكابلي جروا معا
الناس المعاه من الصباح قايمين و قاعدين راسهم انقطع زي قطعت راسنا في حكومتنا دي يطردوا دول و يجيبو دول و تغيرات البرهان بقت زي تغيرات مدرب الهلال الزمان الاسمه (ريكاردَو) داك : يطلع (مهند) و يدخل (كرنقو) فهسه يمشي (البزعي) و يجي (لقمان) و يمشي (لقمان) و يجي (البزعي) يعني مافي جديد بس المرتبة تنبلا بجاي يقلبوها بغادي؛ البحصل دا لا بقدم ولا باخر؛ لا بنفعنا يمين ولا يسار؛ ب ولا بخلصنا دعم سريع ولا حركات؛ فقط خلاصنا بايدنا انحنا ديل؛ فلازم ننبذ الفرقة و الجهوية و الحزبية و نتلموا كلنا يد واحدة لنبنيهو البنحلم بيهو .
خالص ودي
ملاح محمد بشير الجبوري
123303887.123102717
أبوزيد ديسمبر 2022
