منوعات

ليبيا بالخلاء

ملاحات( 604)

الخرطوم:مدني نيوز

ملاح محمد بشير الجبوري

زمان زمن كان المغترب ليهو شنة و رنة كان اي شاب داير يغترب؛ و طبعا كانن ستات الدلوكة شغالات ليك عزف شديد في الوتر دا زي :
المغترب في مشيتو فرق؛
بعمل ايه لمزاج القلب؛
كي واي ولا تاجر غرب؟
؛؛؛؛
خاشة مليط بتاوق الشماسة؛
برقة عصييير ليبيا دايرة سياسة؛
؛؛؛؛؛
فكان الزمن داك الصبيان المتمكنين بمشوا السعودية؛ و النص نص بمشوا العراق؛ و البراهم كي بدقشوا ليبيا لانها ساهلة و بتتجاسف ؛
اها في حلة كدة صبيانها ديل زرعوا الفول دا هبطرش؛ و اي واحد لسان حاله بقول كن ربنا ادانا العافية و كفانا شر الافات السنة دي ليبيا جاكي زول؛ و طبعا دي واحدة من الحاجات الما خلتنا نتقدموا اننا ما قادرين نستثمر داخل بلدنا او بالأحرى ما بنعمل هنا بنفس الجدية البنعملوا بيها برة البلد دي؛ ياخي السوداني برة السودان العامل اقوى زول؛ و الموظف مضرب المثل في التفاني و الانضباط؛ و تعال شوفه هنا : الغرض الحق تضقية في دقيقة؛ يوم كامل ما بخلصك؛ و اخير الشغالين بسجمهم دا؛ في واحدين من شقة السرحان لمن الشمس تقع شغالين كتشينة و ضمنة و ضالة و بتناقشوا انو البلد دي ما دايرة تتصلح؟ كدي تصليح البلد خلوه؛ الشمس الوقعت دي انتم هسه فطرتوا؟
اها صبيان الحلة دي مع لمة فولهم جاهم ليهم ضيف نزل في شيخ الحلة و قال هو قاعد يودي الناس ليبيا بالخلاء فلو في زول داير يمشي؟ ييييييييييييك الحلة كلها سجلت عنده صبيان و رجال؛ يوم كدا بالليل لماهم كلهم و عندة كمرا بدون فيلم و مع الظلام داك صورهم و استلم منهم قروش التذكرة و الاعاشة و قال ليهم ماشي الخرطوم اجيب الجوازات و جاي و بعد باكر بعد صلاة الصبح نتلاقوا في المحل الفلاني و جيتوا قبالي تلقوا العربية واقفة بس اركبوا بدون اي ازعاج لان الشغلة دي تهريب و الحكومة كن عرفت بتورينا نجوم القايلة؛
اليوم المتفقين عليه ناس الحلة كلهم جو و فعلاً لقوا العربية واقفة و ركبوا؛
سبحان الله اليوم داك سيد العربية الهمسوا شنو ما معروف قال داير يمشي يشوف عربيته فلقاها مرصوصة رصة جراد في هجليجاية؛ انتو لشنو السنة الجراد و الطير لمن دقشوا الزراعة مافي زول من ناس الحكومة اشتغل بيهم؟ ياخي خليك من الطير و الجراد؛ حمى الضنك في زول اشتغل بيها شغلة؟ و حمى الضنك ذاتها عرفناها اها الشغل الجا لناس مدرسة قريضة دا شنو؟
انتو ما ملاحظين انو الخريف السنة دي قسا علينا اكثر من اللازم و غرقنا غرق الويل ؟
و بعد الخريف حروب و صراعات قبلية في كل انحاء البلد؛ و بعديها جراد و طير طلعوا عين الزراعة؛ و بعديهم و حمى ضنك و هستريا و لسه الايد في الجراب؛
يا جماعة كدي تعالوا نرجعوا لله و نستغفروا عشان حالنا دا ينصلح؛
اها سيد العربية راسه انقطع للناس المتشعلقين في عربيتو فقال ليهم :
يا جماعة الحاصل شنو؟
رد ليهو واحد : يا زول شوف اسمك في الدفتر كن معانا اركب و كن ما معانا اتخارج ما تجيب لينا هواء انحنا ديل ماشين ليبيا بالخلاء؛
سيد العربية ضحك و قال ليهم يا ناس انزلوا العربية دي حقتي انا دا و متعطلة و مكنتها ذاتها وديتها الصيانة في الخرطوم؛ انزلوا ساكت انتو راكبين ليكم ماسورة؛
قالوا ليهو : يا زول انت ما نصيح ولا شنو ؟ انت اصلك جاسوس حق حكومة فلو ما خطيتنا هسه بنودروا ضمتك احسن ليك اتخارج؛
سيد العربية لمن شاف الصبيان ديل كلامهم حار قال احسن يشوف العاقلين؛ فقال ليهم انتو ما فيكم ناس كبااار؛ كباركم وين؟
قالوا ليه كبارنا راكبين قدام؛
طوالي قنع من خيرٍ فيها و اتخارج ؛ فديل حكامنا من الاستقلال للان مركبننا في العربية المتعطلة دي؛ و مافي حاجة ضرتنا زي ركبة كبارنا قدام فهم البقولوا لينا العربية هسه بتدور؛ و العالم ماشي و انحنا بعربيتنا واقفين في محلنا؛ حلنا الوحيد ننزل كبارنا ديل و نثور من جديد ضد كل الاحزاب و الحركات و المليشيات و نجيبوا افهمنا و انظفنا بل نقدموا ناس لا عندهم حزب ولا قبيلة همهم البلد و شغلهم الشاغل بناءها فنقدموهم و نملوا وراهم لنبنيهو البنحلم بيهو

خالص ودي
ملاح محمد بشير الجبوري
123303887.123102717
أبوزيد نوفمبر 2022
🌸🌸🌸🌸🌸🌸🌸🌸🌸

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى